«Дарынды ұрпақ – ел болашағы» атты жетістіктер форумы

Шымкент қаласы білім басқармасына қарасты №80 IT мектеп – лицейі «Мектеп – оқушы – ата-ана» үштік одағын кіріктіре отырып «Дарынды ұрпақ – ел болашағы» атты жетістіктер форумы өткізді. Мектебіміздің  дарынды да талантты оқушылары марапатталды. Халықаралық, республикалық, олимпиадалар мен турнирлерде білімімен мыңды жыққан, ғылыми жарыстардың және өнер байқауларының жеңімпаздары мен  өңіріміздің ғана емес, еліміздің намысын қорғаған, көк туымызды желбіреткен дарынды оқушыларымызды құрметтеу жақсы дәстүрге айналды.        

Бұл  құрмет тек қана талант иелеріне ғана емес, сонымен қатар олардың жетекші-мұғалімдеріне, жас таланттардың білім белестерін бағындыруға себепкер болған ата-аналарына да  арналды. 

Оқушылар шеруі барысында мектебіміздің даңқын асырып жүрген мың бұралған бишілеріміз, жезтаңдай әншілеріміз өз өнерін көрсетті.

Алғы сөзді мектеп директоры Б.Қ.Абдишукурова бастап іс-шараны ашып берді, әрі қарай «Лицей күні» мерекесіне орай 7-сынып оқушыларына арнайы галстуктер тағылды. Оқушылар мектеп басшылығы мен ата-аналар алдында Ант қабылдады.Мектебіміздің үздіктерін, олимпиада және ғылыми жоба жүлдегерлерін директордың ғылыми-әдістемелік инновация бойынша орынбасары А.А.Жүсіпова марапаттады, сонымен қатар өнер мен спортта жетістікке жеткен оқушылардың ата-анасына Алғыс хаттар берілді.